Një 28-vjeçar është arrestuar në Shkodër, pasi dyshohet se shiste kanabis, kryesisht në afërsi të perimetrit të sigurisë së shkollave.

Në pranga përfundoi shtetasi E. Z., 28 vjeç, banues në Shkodër, i cili u kap teksa drejtonte automjetin e tij. Gjatë kontrollit të mjetit, policia gjeti dhe sekuestroi një sasi lënde të dyshuar narkotike kanabis sativa.

Kontrolli vijoi edhe në banesën e të arrestuarit, ku u gjet një tjetër sasi lënde bimore e dyshuar narkotike, e ndarë në doza dhe e gatshme për tregtim.

Në total, policia sekuestroi rreth 1.5 kilogramë lëndë të dyshuar narkotike kanabis, një pjesë e saj në formë xhelatinoze, si dhe një automjet, aparat celular, peshore elektronike dhe pajisje për paketim me vakum.

Sipas hetimeve, 28-vjeçari dyshohet se e siguronte lëndën narkotike me qëllim shitjen e saj, kryesisht pranë perimetrit të sigurisë së institucioneve arsimore.

Materialet procedurale i janë referuar Prokurorisë për veprime të mëtejshme.

/rtsh.al/