Drejtoria e Përgjithshme e Doganave (DPD) ka zhvilluar një takim pune me përfaqësues të shoqërisë “ALBTrace CO sh.a.” dhe operatorët ekonomikë të sektorëve të duhanit e pijeve alkoolike, për të analizuar zbatimin e sistemit të ri të përmirësuar të pullave fiskale, i cili ka hyrë në fuqi më 1 korrik 2026.

Reforma përfshin integrimin e elementeve fizike të sigurisë me teknologjinë digjitale. Çdo pullë fiskale tashmë pajiset me një identifikues unik digjital, duke mundësuar lidhjen e drejtpërdrejtë me të dhënat e produktit dhe monitorimin e plotë gjatë të gjithë ciklit të qarkullimit në treg.

Gjatë takimit, Drejtori i Përgjithshëm i Doganave, Besmir Beja, nënvizoi domosdoshmërinë e një bashkërendimi sa më efektiv mes autoriteteve dhe bizneseve.

“Modernizimi i administrimit të pullave fiskale duhet të sjellë njëkohësisht më shumë eficiencë në proceset e operatorëve ekonomikë dhe forcim të kontrollit e të gjurmueshmërisë së produkteve subjekt akcize.”, tha ai.

Sistemi i ri lehtëson gjithashtu procedurat teknike për bizneset. Ndërsa më parë prerja e pullave të duhanit bëhej nga vetë operatorët përmes palëve të treta, tashmë ALBTrace CO sh.a. i ofron ato të prera dhe të gatshme për aplikim, duke ulur kostot operative. Gjithashtu, procesi i miratimit të porosive nga Dogana thjeshtohet, me një afat të përcaktuar prej dy ditësh pune nga marrja e kërkesës në sistem.

Një risi e rëndësishme e këtij kuadri është përfshirja e drejtpërdrejtë e qytetarëve në verifikimin e tregut. Përmes aplikacionit mobil “ALBConnect”, konsumatorët mund të skanojnë pullën e produktit për të kontrolluar autenticitetin e tij në kohë reale dhe për të raportuar rastet e dyshimta të falsifikimit. DPD njoftoi se do të vijojë dialogun me operatorët dhe do të organizojë cikle trajnimi për subjektet që hasin vështirësi teknike gjatë procesit të aktivizimit digjital.

Risitë kryesore të sistemit të ri të pullave fiskale

• Identifikuesi unik digjital: Çdo pullë fiskale përmban një kod digjital të vetëm që lidhet me të dhënat specifike të produktit (alkool, duhan, etj.).
• Aktivizimi në rul e digjital: Mundësi për aktivizim të shpejtë në sistem përmes skanimit të pullës së parë dhe të fundit të intervalit të përdorur.
• Thjeshtimi i procesit të duhanit: Pullat ofrohen të prera dhe të gatshme nga kompania furnizuese, duke eliminuar koston e përpunimit nga operatorët.
• Aplikacioni “ALBConnect”: Mjet publik falas për konsumatorët për të verifikuar nëse produkti është origjinal apo i falsifikuar si dhe për të dërguar sinjalizime direkte.
• Miratim i shpejtë administrativ: Autoriteti doganor detyrohet të shqyrtojë dhe miratojë porositë e pullave brenda 2 ditëve pune.

/rtsh.al/