Data 1 prill njihet në shumë vende të botës si “Dita e Gënjeshtrave”, një ditë ku njerëzit bëjnë shaka me njëri-tjetrin dhe shpesh realizojnë rrengje të papritura. Por si ka nisur kjo traditë dhe çfarë fshihet pas kësaj dite të veçantë?

Në fakt, dita e 1 Prillit ka një histori të pasur dhe shumë të vjetër. Disa teori sugjerojnë se kjo ditë dikur është festuar si dita e Vitit të Ri. Por, kur kalendari Julian u zëvendësua me kalendarin Gregorian më 1582 nga Papa Gregory XIII, Dita e Vitit të Ri u vendos më 1 janar. Ky ndryshim i datës solli një ndarje mes atyre që e pranuan kalendarin e ri dhe atyre që vazhduan ta festonin Vitin e Ri më 1 prill. Kjo bëri që disa njerëz të merrnin përsipër të bëjnë shaka dhe gënjeshtra me ata që ende festonin në datën e vjetër të Vitit të Ri, duke e shndërruar këtë ditë në një mundësi për të bërë shaka.

Një prej shpjegimeve më interesante për origjinën e kësaj dite lidhet me një histori të veçantë nga periudha e sundimit të Perandorit Konstantin. Sipas profesor Joseph Boskin, i cili e shpjegoi teorinë e tij në vitin 1983, gjatë një periudhe kur Konstantini sundonte, një shakaxhi i quajtur Kugel i tha perandorit se ai mund ta drejtonte perandorinë shumë më mirë se ai. Konstantini, i habitur dhe duke e marrë me humor, e lejoi Kugel të bëhej perandor për një ditë. Kugel, duke shfrytëzuar këtë mundësi, shpalli 1 prillin si “Dita e Gënjeshtrave”, një ditë kur çdo gjë mund të ishte e mundur dhe çdo gjë mund të ishte një shaka.

Sot, Dita e 1 Prillit festohet në shumë vende të Europës dhe më gjerë, si një ditë për shaka dhe rrengje të pafajshme. Ajo është një mundësi për të argëtuar veten dhe për të sjellë humor dhe gëzim në jetën e përditshme.

/rtsh.al/