Ministrja e Turizmit dhe Mjedisit, Mirela Kumbaro, ka zhvilluar një takim me përfaqësues të udhërrëfyesve turistikë për shpërndarjen e 700 certifikatave të rinovuara pa afat, një hap i rëndësishëm për të lehtësuar burokracitë dhe për të përmirësuar procesin e certifikimit për këtë profesion në industrinë e turizmit.

Ky ndryshim ka për qëllim të përgjigjet më mirë kërkesës në rritje për udhërrëfyes turistikë, një sektor që ka pësuar një zhvillim të jashtëzakonshëm në katër vitet e fundit, duke u rritur pothuajse tetë herë.

 “Deri më sot, kemi 932 udhërrëfyes të certifikuar, përfshirë 112 udhërrëfyes të specialitetit të veçantë, 691 udhërrëfyes turistikë kombëtarë dhe 120 udhërrëfyes lokalë. Ky numër i shtuar gati tetëfish në katër vitet e fundit është dëshmi e zhvillimit të tregut të turizmit dhe mundësive të mëdha për krijimin e vendeve të punës dhe mbështetje për ekonominë vendase,”, deklaroi Kumbaro.

Ministrja Kumbaro e vlerësoi këtë hap si një mundësi për të rinjtë që duan të ndërtojnë një karrierë në turizëm dhe për të promovuar vlerat natyrore, ekoturizmin dhe turizmin në zonat e mbrojtura.

“Nga dy vjet që ishte afati i certifikatave, tani po e kalojmë këtë kufi dhe udhërrëfyesit nuk do të kenë më nevojë të rinovojnë periodikisht certifikatat. Ky ishte një kërkesë e vazhdueshme e sektorit, dhe sot kemi shpërndarë 700 certifikata pa afat, që janë një shpërblim për angazhimin dhe punën e palodhur që keni bërë,” – shtoi ajo.

Gjithashtu, Kumbaro njoftoi se tashmë ekzistojnë 15 qendra të akredituara që ofrojnë programe trajnimi për formimin e udhërrëfyesve turistikë kombëtarë, lokalë dhe të specialiteteve të veçanta, duke e bërë më të lehtë për profesionistët e rinj që të angazhohen në këtë industri në rritje.

Ky vendim është një hap tjetër përpara në forcimin e industrisë së turizmit në Shqipëri dhe mbështetjen e zhvillimit të qëndrueshëm të saj.