Për të dytin vit radhazi në ndihmë të bujqësisë dhe zhvillimit rural po aplikohet Skema Kombëtare e Investimeve. Aplikimet kanë nisur dhe do të zgjasin deri në fund të muajit shtator.

“Kjo skemë përmbledh nëntë masa, duke filluar qysh nga mbjellja e fidanëve të pemëve frutore deri në përpunimin e fruta-perimeve. Këtu përmblidhen mekanika, blegtoria, ndërtimi i stallave, bletaria. Kjo është një skemë shumë e gjerë që përfshin gjithë bujqësinë,” thotë Ferdinand Shani, drejtor i Agjencisë Rajonale të Ekstensionit Bujqësor Lushnjë.

Vitin e shkuar në Lushnjë, kërkesat më të mëdha ishin për fonde për përmirësimin e mekanikës bujqësore. Ky interes po vihet re edhe në ditët e para të aplikimeve, ndërsa një tjetër mënyrë që fermerët të përfitojnë fonde është janë dhe kreditë e buta për këtë sektor në vlerën 250 milionë euro e me vlerë interesi vetëm 2%.

“Shteti mbulon 50 për qind të faturës për çdo pjesë të aplikimit që bën fermeri. E reja këtu është që mund të futen edhe me kredi të buta, me garanci sovrane nga ana e shtetit,” shton z. Shani.

Asistencë për plotësimin e dokumentacionit, të interesuarit marrin pranë Drejtorive të Bujqësisë dhe tek Agropikat, ndërsa dosja dorëzohet nga vetë fermerët pranë zyrave të AZHBR-së në Tiranë.

Gazetare: Nermin Spahiu

/rtsh.al/