Një raport i Institutit Australian të Shkencave Detare (AIMS) tregon se pjesë të mëdha të Barrierës së Madhe Koralore kanë humbur ndjeshëm mbulesën e koraleve, kryesisht në degët veriore dhe jugore. Kjo është rënia më e madhe e mbulesës korale në 40 vite.

Koralet janë goditur muajt e fundit nga zbardhja e theksuar, e shkaktuar nga rritja e temperaturës së ujit për shkak të ndryshimeve klimatike, si dhe nga ciklonet tropikale që kanë dëmtuar strukturat e tyre.

Sipas raportit, ekosistemi mund të jetë afruar në një pikë kthese ku nuk do të arrijë të rikuperohet mjaftueshëm mes ngjarjeve të njëpasnjëshme katastrofike, duke u përballur me një të ardhme të paqëndrueshme.

“Këto korale rriten më shpejt dhe janë të parat që zhduken. Barriera e Madhe Koralore është një vend kaq i bukur dhe ikonik, sa ia vlen vërtet të luftosh për të. Dhe nëse mund t’i japim një shans, ka treguar një aftësi të lindur për t’u rikuperuar”, tha udhëheqësi i studimit të AIMS, Dr. Mike Emslie.

Barriera e Madhe Koralore, struktura më e madhe e gjallë në botë me një gjatësi prej 2,300 km, strehon rreth 25% të të gjitha specieve detare. Ndërsa korali mund të rikuperohet nga stresi i nxehtësisë, ky proces kërkon disa vite, dhe me përshpejtimin e ndryshimeve klimatike rreziku për humbje të pakthyeshme mbetet i lartë.

/rtsh.al/