300 maturantë janë regjistruar në programet e studimit të Universitetit “Fan Noli” të Korçës, numër që është pothuajse i njëjtë me atë të një viti më parë akademik.

Drejtori i Kurrikulës, Artur Prifti, ka bërë të ditur se edhe këtë vit programet më të kërkuara janë ato të teknologjisë, sporteve, infermierisë, financës dhe gjuhës angleze.

Sipas Priftit, për programin e Ekonomisë, këtë vit nuk janë kërkuar kuota, ndërkohë që ka një program të riorganizuar në Fakultetin e Bujqësisë.

“I vetmi program studimi që ne nuk kemi kërkuar kuota është programi i studimit të ekonomisë. Ky program studimi, sipas udhëzimeve përkatëse, do të aplikohet për mbylljen e tij. Është një procedurë normale që ndiqet nga programet e studimit që nuk kanë ecuri normale. Programe të reja të hapura nuk ka, por ka vetëm një program të riorganizuar në Fakultetin e Bujqësisë, i cili është rinovuar për t’iu përshtatur më tepër tregut të punës”, tha Prifti.

Në Universitetin “Fan Noli” të Korçës ka 26 programe studimi bachelor dhe dyvjeçare në katër fakultete.

Gazetare: K. Koçi

/rtsh.al/