Fëmijët e komunitetit egjiptian në Shkodër po bëhen çdo ditë e më shumë pjesë e shkollave dhe kopshteve publike, duke ndjekur edukimin krahas bashkëmoshatarëve të tyre.

Arsimi është parë si mundësia më e mirë për integrimin dhe të ardhmen, ndaj prindërit po tregojnë përkushtim për të siguruar që fëmijët e tyre të mos mbeten jashtë procesit arsimor.

Kreu i Shoqatës së Romëve dhe Egjiptianëve në Shkodër, Kydret Shatza, shprehet se këtë vit të ri shkollor, 170 fëmijë të këtij komuniteti janë bërë pjesë e procesit mësimor të klasave të para.

“85 për qind e fëmijëve i kemi në shkollë. Të gjithë familjarët e komunitetit egjiptian organizohen. Presim tash të marrim furnizimin që u është premtuar me çanta e libra. Sivjet janë regjistruar shumë,” thotë z. Shatza. 

Megjithatë, sfidat mbeten të pranishme, kryesisht ato të natyrës ekonomike dhe sociale, të cilat shpesh ndikojnë në rrezikun e braktisjes së shkollës.

Për këtë arsye, institucionet arsimore në bashkëpunim me organizata vendore e ndërkombëtare po ofrojnë mbështetje konkrete për familjet, përmes pajisjes me libra, mjete shkollore dhe aktivitete jashtëshkollore.

Gazetar: Mirsad Rakaj

/rtsh.al/