Në fshatin Selitë të Cërrikut, bujqësia mbetet burimi kryesor i të ardhurave për shumë familje.

Një prej tyre është edhe Arian Duzha, fermer i cili pas disa vitesh emigracioni ka vendosur t’i rikthehet punës në tokën e tij. Ai tregon se investimi në bujqësi nuk është i lehtë, por është mënyra më e drejtë për të ndërtuar një të ardhme pranë familjes. Fermeri shprehet se pas bllokimit të domateve në tregjet e Kroacisë, shumë tregtarë janë të tërhequr dhe më pak të gatshëm për të blerë produktet e fermerëve shqiptarë.

Kjo situatë ka penalizuar edhe ata që punojnë me ndershmëri dhe respektojnë rregullat, duke krijuar pasiguri për të ardhmen e tyre.

“Shumë jemi trembur nga ajo, sepse i thonë gjithë ky mall. Ne jemi me kredi. Tashti kredia s’di gjë. Vjen data dhe do lekët ai [banka]. Ku të futem?! Unë jam i pastër. Të marrin një domate këtu dhe nëse del me atë [pesticide tej normave] t’i vënë shiritin. Shpresojmë që të marrë rrugëzgjidhje kjo gjë,” thotë z. Duzha.

Fermeri thotë se ka përfituar subvencione nga shteti, ndihmë që e ka lehtësuar sadopak barrën e shpenzimeve dhe i ka dhënë më shumë kurajë për të vijuar punën.

“Kemi qenë jashtë shtetit. Vuajta vetëm. U mërzita vetëm. Familja këtej, vetë andej, thashë ‘po i hyj kësaj me gjithë shokë’. Mora kredi dhe me qejf… Thashë të punoj në vendin tim, tokën time, shtëpinë time,” shprehet fermeri..

Për fermerët e Selitës dhe më gjerë, sfidat janë të shumta, por shpresa për një treg të rregullt dhe të drejtë mbetet shtysa kryesore për të vazhduar punën në tokë.

/rtsh.al/