Lini, një nga fshatrat më të njohura të Pogradecit për palafitet e tij, ka marrë së fundmi një status të veçantë nga UNESCO, që e bën këtë destinacion më të njohur dhe të mbrojtur ndërkombëtarisht për trashëgiminë kulturore. Ky titull i akorduar ka rritur vëmendjen për Linin si një destinacion turistik dhe ka sjellë mundësi të reja për zhvillimin e turizmit në këtë zonë.

Loridela Beqari, Përgjegjëse e Turizmit në Bashkinë e Pogradecit, theksoi se ky titull ka një rëndësi të madhe për mbrojtjen dhe promovimin e trashëgimisë kulturore. “Lini do të jetë i njohur jo vetëm në arenën kombëtare, por dhe në atë ndërkombëtare”, u shpreh ajo gjatë një interviste pwr emisionin “Mirëmëngjes Shqipëri” në RTSH1.

“Lini është i njohur jo vetëm për pjesën e palafiteve aty por edhe për  titullin që i është  akorduar së  fundmi. Ky titull e bën me një status më të lartë për sa i përket UNESCO-s dhe mbrojtjes që ka ky institucion ndaj këtyre prioritetet që lidhen drejtpërdrejt me trashëgiminë kulturore. Tashmë Lini do të jetë shumë i njohur për sa i përket jo vetëm  arenës kombëtare por dhe asaj ndërkombëtare”, u  shpreh Beqari.

Po ashtu, Beqari informoi se janë bërë zbulime të reja arkeologjike në zonën e Linit, ku janë gjetur objekte që dëshmojnë periudhën e hershme të jetesës në palafite. Kjo ka sjellë një rritje të interesit për zonën, si dhe investime në bujtina dhe infrastruktura, që po ndihmojnë në krijimin e mundësive për punësim për banorët lokalë.

“Kohët e fundit pala nga ana e Shqipërisë kanë pasur disa projekte për sa  i përket zbulimeve arkeologjike për sa i përket Linit. Janë zbuluar disa objekte të cilat tregojnë periudhën e hershme në pjesën e palafiteve. Në fshat për banorët janë krijuar me shumë mundësi punësimi për sa i përket turizmit por dhe investime te ndryshme që  janë kryer në  bujtina që tërheqin turist të ndryshëm. Për sa i përket statistika që ne kemi hulumtuar në bazë  të elementeve të ndryshëm që thithin turist ka pasur një rritje me 30% më shumë në krahasim me vitet e kaluara”, theksoi ajo.

Sipas të dhënave të Bashkisë së Pogradecit, numri i turistëve ka pësuar një rritje prej 30% krahasuar me vitet e kaluara, duke e bërë Linin një nga destinacionet më të vizituara në rajon.

/rtsh.al/