30 vjet dritë, dashuri dhe bashkim njerëzor. Shkolla Speciale “3 Dhjetori” në Shkodër ka shkruar një histori të jashtëzakonshme përkushtimi dhe dinjiteti.

Është speciale për dy arsye të thjeshta: për dashurinë që dhurohet dhe përkushtimin që jepet në këtë institucion arsimor, tha Hasan Muça, Drejtor i DRAP Lezhë.

“Fillimi ka qenë në një klasë të vetme, përkushtimi dhe puna e jashtëzakonshme bënë që të hapej shkolla”, tha Enkeleda Mataj, Drejtore e Shkollës “3 Dhjetori”.

Në këtë përvjetor jubilar, u nderua çdo mësues, çdo prind që ka besuar, dhe çdo hap i bërë me kurajo në rrugën e integrimit.

Vjola Paçrami shërbeu për 25 vite fëmijëve me aftësi ndryshe.

“Nuk i kam ndarë as në një moment të vetëm të gjitha aktivitetet që ka bërë qendra kulturore e fëmijëve”, tha Paçrami.

Marsida ka dalë nga bankat e asaj shkolle, sot ajo kujton me nostalgji mësuesen e saj dhe faktin që ka mësuar të shkruajë e lexojë.

Ky 30-vjetor erdhi si festë për nxënësit, prindërit dhe mësuesit, ku pjesë e interpretimeve u bë banda The Door, e dalë po nga kjo shkollë. Sot, 30 vite më vonë, shkolla vazhdon të jetë një shembull frymëzimi për gjithë komunitetin dhe veçanërisht për 60 fëmijë që marrin dije aty.

Gazetare: M. Gjoni

/rtsh.al/