Ndërhyrja në argjinaturën e Lumit Devoll ka nisur pas dëmtimeve të shkaktuara nga përmbytjet që përfshinë Bashkinë Maliq rreth një muaj më parë.

Si pasojë e prurjeve të shtuara dhe presionit të madh të ujit, një pjesë e argjinaturës u ça, duke rrezikuar tokat bujqësore, infrastrukturën dhe banesat përreth.

Menjëherë pas stabilizimit të situatës, u ndërmorën vlerësimet teknike dhe u hartua plani i ndërhyrjes për rikuperimin dhe përforcimin e argjinaturës.

Drejtori i Agjencisë së Ujitje-Kullimit në Maliq bën me dije se punimet konsistojnë në sistemimin e zonës së dëmtuar, mbathjen me gurë dhe përforcimin e strukturës mbrojtëse, me qëllim parandalimin e dëmtimeve të ngjashme në të ardhmen.

Kjo ndërhyrje është një hap i rëndësishëm për rritjen e sigurisë së komunitetit dhe mbrojtjen e territorit nga fenomenet natyrore për të garantuar mbrojtjen e jetës, pronës dhe tokave bujqësore në bashkinë Maliq.

Gazetare: Geralda Manushi

/rtsh.al/