Afro 1 860 fermerë në rajonin Lushnje- Fier- Vlorë- Gjirokastër rezultojnë të kenë pësuar dëme në ekonomitë e tyre nga përmbytjet e këtyre ditëve.  

Në fshatin Hingë të Dimalit rreth 100 hektarë me mandarina janë ende në pushtetin e ujit, që nga reshjet e nëntorit dhe dhjetorit. Në këto kushte jo vetëm prodhimi i këtij viti ka shkuar dëm, por rrezikojnë dhe pemët mbi 20-vjeçare.

“Kemi një muaj e gjysmë. Nuk është se ne përmbytemi një herë nga lumi, por po përmbytemi një herë në 2 apo 3 ditë. Kjo nuk është faji i natyrës, por ka të bëjë me diçka tjetër se nuk ka mundësi”, tha një fermer i prekur.

Në serat bujqësore të fshatit Goriçan fidanët e përmbytur nga uji kanë ngrirë nga ulja e menjëhershme e temperaturave. Ky fermer thotë se nga reshjet e fundit i janë përmbytur 2 dynymë e 800 metra të mbjella

“Kam 4 mijë bimë këtu, i thonë mbi 2 milionë vetëm fara e specit. Po domatja, vajti 3.5 mln lekë vetëm fidani lërë të tjerat”, tha një fermer.

Ndërsa ende vuajnë pasojat e reshjeve të nëntorit dhe dhjetorit, nuk u shpëtuan as përmbytjeve të këtyre ditëve:

“Lumi Seman të paktën këtë javë nuk është tërhequr fare”, tha fermeri.

Nga reshjet dhe vërshimet e janarit në rajonin Lushnje-Fier- Vlorë- Gjirokastër janë dëmtuar 1 859 fermerë. Sipas të dhënave zyrtare nga Agjencia Rajonale Bujqësore e këtij rajoni nga verifikimet e deritanishme mbi 4 mijë hektarë me të mbjella rezultojnë të përmbytura, pjesën më të madhe të të cilave; 1 810 ha  ishin të mbjella me foragjere e 1 330 me drithëra.

Dëmet janë shtrirë dhe në kafshë e shpendë. 56 gjedhë, 12 krerë të imta, 5 mijë shpendë, 75 koshere bletësh dhe 4 stalla rezultojnë  të mbytura.

Gazetare: N. Spahiu       

/rtsh.al/