E përditshmja italiane “La Repubblica” ka rikthyer në qendër të vëmendjes misterin e pallatit Ca’ Dario, duke njoftuar se “godina e mallkuar” e Venecias është sërish zyrtarisht në shitje. Ky lajm pason një sërë tentativash të dështuara ndër vite për të gjetur një blerës që guxon të sfidojë legjendën e errët që rrethon këtë kryevepër të Rilindjes.

​Në një intervistë për emisionin “Në Radio” të Andri Xhahut në Radio Tirana, gazetarja shqiptare Alba Kepi nga Roma ka zbardhur detaje magjepsëse mbi këtë pronë, e cila përfaqëson një paradoks të vërtetë: një simbol i stilit “Made in Italy”, por që askush nuk guxon të banojë aty. ​

​Pallati, një nga xhevahiret e arkitektit Pietro Lombardo u ndërtua në vitin 1487. Gazetarja Kepi bën me dije se që prej vitit 2006, pallati zotërohet nga një shtetas amerikan, identiteti i të cilit mbetet mister. ​“Ai nuk e ka komunikuar kurrë identitetin e tij, pikërisht për shkak se nuk donte të përfshihej në legjendën e këtij pallati. Deri më sot nuk ka banuar kurrë në të dhe as nuk e ka dhënë me qira”, shpjegon Kepi.

​​Sot, kjo pronë me mbi 1000 metra katrorë, 15 dhoma gjumi dhe 8 banja, ka dalë në ankand nga shtëpia prestigjioze Christie’s. “Ky pallat rikthehet në kronikën e ditës sepse vlera e tij është mjaft e lartë, flasim për 18-20 milionë euro”.

​​Mallkimi i Ca’ Dario-s nuk është thjesht një legjendë urbane, por një varg ngjarjesh tragjike që nisi me pronarin e parë. “Giovanni Dario ka qenë sekretar i senatit të Republikës Veneciane me një rol të rëndësishëm si shpëtimtar i atdheut sepse thuhet që ka qenë ndërmjetës i nënshkrimit të Traktatit të Kostandinopojës. Këtë pallat ia la në pajë vajzës së tij Marietta, e cila martohet me Vincenzo Barbaro, një sipërmarrës i njohur, por që shkon në falimentim ekonomik dhe e vrasin. Pas vdekjes së tij, edhe bashkëshortja vetëvritet duke u hedhur në Kanalin e Madh të Venecias. Thuhet se edhe djali i tyre i dytë është vrarë në një atentat në Greqi.”

Ky ishte vetëm fillimi i një serie vdekjesh. ​Në listën e viktimave të “mallkimit” është edhe një tregtar armen gurësh të çmuar që kur u bë pronar i pallatit përfundoi në rrënim financiar.

Kepi sjell në vëmendje edhe historinë e menaxherit të grupit legjendar The Who, Christopher Lambert, i cili falimentoi ndërsa kishte pronësinë e pallatit. “Thuhet se ndërsa Lambert e kishte në pronësi këtë pallat, aty shkon për të kaluar disa ditë pushimesh bateristi i grupit, i cili humbet jetën pas një problemi shëndetësor”.

​Pavarësisht famës së keqe, Ca’ Dario mbetet një magnet për artin. Ai është përjetësuar në tablotë e Claude Monet dhe ka shërbyer si sfond për mjaft skena filmi e poezi botërore. Fasadat e tij me mermer shumëngjyrësh që reflektohen në Kanalin e Madh e bëjnë atë një nga godinat më magjepsëse në botë.

​Pyetja që ngre sot opinioni publik në Venecia është: A do të mbyllet kjo shitje? Siç shprehet Kepi, vendasit janë skeptikë. Çdo 2-3 vite, lajmi i shitjes rikthehet, por blerësit potencialë shpesh tërhiqen në momentin e fundit, të mposhtur nga frika e një legjende që prej pesë shekujsh nuk njeh mëshirë.