Ministria e Arsimit ka publikuar udhëzimin zyrtar për organizimin e Vlerësimit të Arritjeve për nxënësit e klasave të pesta në arsimin fillor, për vitin shkollor 2025–2026. Ky testim kombëtar, i cili vlerëson njohuritë bazë të fëmijëve, do të zhvillohet më datë 21 Maj 2026.

Sipas udhëzimit të firmosur nga Zëvendësministrja e Arsimit, Orjana Osmani, provimi do të jetë i integruar dhe do të testojë nxënësit në tri lëndë kryesore njëkohësisht.

Detajet kryesore të testimit

Për të shmangur konfuzionin ditën e provimit, nxënësit dhe prindërit duhet të kenë parasysh oraret dhe strukturën e mëposhtme.

Provimi do të jetë një test i vetëm i integruar me pyetje nga Gjuha Shqipe, Matematika dhe Dituria e Natyrës, bazuar në programin e hartuar nga ASCAP.

Testimi nis zyrtarisht në orën 10:00 dhe do të zgjasë saktësisht 1 orë e 30 minuta.

Është e detyrueshme që nxënësit të paraqiten në qendrat e testimit 1 orë përpara, pra në orën 09:00.

Kujdes i veçantë për pakicat dhe nxënësit me aftësi të kufizuara

Udhëzimi i ri garanton gjithë përfshirje dhe mundësi të barabarta për të gjithë nxënësit, duke përcaktuar rregulla specifike për kategori të ndryshme.

Për nxënësit e minoritetit grek dhe maqedonas, pyetjet e Matematikës dhe Diturisë së Natyrës do të jenë të përkthyera në gjuhën e tyre amtare.

Qendra Burimore “Ramazan Kabashi” do të kujdeset për tërheqjen e testeve një ditë para provimit për t’i kthyer ato në sistemin e shkrimit Brail.

Për nxënësit me aftësi të kufizuara, testimi do të përshtatet në bazë të Planit Edukativ Individual (PEI) me të cilin ata kanë punuar gjatë vitit.

Administrimi dhe siguria

Për të garantuar mbarëvajtjen e këtij procesi të rëndësishëm, Agjencia Kombëtare e Arsimit Parauniversitar (AKAP) do të monitorojë nga afër çdo qendër testimi dhe do të raportojë çdo parregullsi. Pas përfundimit, të dhënat dhe testet e nxënësve do të arkivohen dhe ruhen nga Zyrat Vendore të Arsimit.

/rtsh.al/