Me një aktivitet 10-vjeçar, Fakulteti Ekonomik në Universitetin “Eqrem Çabej” ofron për të rinjtë pesë programe studimi Bachelor që i përgatisin ata për tregun e punës. Mes tyre renditen edhe degët e përbashkëta me universitete italiane.

“Aktualisht Fakulteti Ekonomik ofron këto programe Bachelor në Kontabilitet, Financë, Administrim Publik dhe Turizëm, të cilët bëjnë të mundur përgatitjen e studentëve për tregun e punës. Gjithashtu, Fakulteti Ekonomik ofron edhe dy programe Bachelor të përbashkët me dy universitete italiane: Menaxhim Dixhital në Universitetin e Salendos dhe Menaxhimi i Turizmit të Qëndrueshëm në Universitetin e Molicës, të cilët u ofrojnë një mundësi jashtëzakonisht të shkëlqyer studentëve për t’u diplomuar dhe për të marrë një diplomë të vlefshme në tregun evropian.” – u shpreh për RTSH Lorenc Koçiu, Dekan i Fakultetit Ekonomik, Gjirokastër.

Në listën e programeve të këtij fakulteti renditen edhe programet dyvjeçare profesionale:

“Ekonomist, asistent administrativ dhe asistent menaxher në shërbimet turistike, të cilat duhet të theksoj që janë tregje jashtëzakonisht të mira sepse po formojnë një staf jashtëzakonisht të mirë për tregun e punës. Fakulteti Ekonomik është i hapur kundrejt gjithë maturantëve të rinj duke ofruar cilësi në arsimin e lartë, duke ofruar mbështetje dhe duke ofruar mundësi si dhe mobilitetin e studentëve për të lëvizur me të gjitha ato universitete partnere me të cilat ne kemi marrëveshje.”

Ndër vite, pedagogët e këtij fakulteti kanë punuar për ngritjen e tyre profesionale. Sot 75% e stafit akademik janë pajisur me tituj dhe grada shkencore, ndërsa 25% janë në proces doktorature.

Gazetare: Y. Ponde

/rtsh.al/