Një konflikt i çastit mes disa personave ka kulmuar në dhunë fizike përgjatë disa minutave në zonën e njohur si “Uji i Ftohtë” në qytetin e Vlorës. Sipas raportimeve nga terreni, sherri është përshkallëzuar kur “një prej personave ka pasur edhe mjet prerës thikë”.

Në vendngjarje kanë mbërritur me shpejtësi shërbimet e sigurisë, të cilat ndërhynë për shuarjen e sherrit. Gjatë veprimeve operativ-procedurale, një nga pjesëmarrësit në konflikt është përpjekur t’i shmanget kontrollit të forcave të rendit.

Përpjekja e njerit nga protagonistët për t’u larguar ka nxitur reagimin e menjëhershëm të efektivëve në terren.

Sipas gazetares së RTSH 24 në Vlorë, gjatë ndjekjes së personit që u largua me vrap, “për ta ndaluar policia ka qëlluar me pistoletë në ajër, por ai nuk ka ndaluar”. Pavarësisht rezistencës fillestare, efektivët mundësuan kapjen e tij “disa metra më tutje”.

Pas kontrollit dhe mbajtjes nën kontroll të territorit, organet e rendit konfirmojnë se “të gjitha palët e përfshira janë shoqëruar në polici”. Fatmirësisht, nga kjo ngjarje “nuk ka persona të lënduar”, ndërsa grupi hetimor po punon për zbardhjen e plotë të rrethanave dhe motivit të konfliktit.

/rtsh.al/