Një aksident rrugor është regjistruar pasditen e kësaj të shtune në autostradën Levan-Tepelenë, në vendin e quajtur Fratar, ku dy automjete janë përplasur me njëri-tjetrin.

Ngjarja ka ndodhur rreth orës 15:30, ndërsa përplasja ka qenë e fortë, duke lënë të plagosur të dy drejtuesit e mjeteve. Menjëherë pas aksidentit, ata janë transportuar me urgjencë drejt Spitalit Rajonal të Fierit, ku po marrin ndihmën e nevojshme mjekësore.

Në vendngjarje kanë mbërritur shërbimet e Policisë dhe grupi hetimor, të cilët kanë nisur punën për zbardhjen e plotë të rrethanave dhe shkaqeve që çuan në aksident. Ndërkohë, është punuar edhe për normalizimin e qarkullimit në këtë aks rrugor.

Sipas të dhënave paraprake, dyshohet se shpejtësia e lartë dhe lagështira në rrugë kanë qenë faktorë që mund të kenë ndikuar në përplasjen e mjeteve. Megjithatë, shkaku i saktë i aksidentit pritet të përcaktohet pas përfundimit të hetimeve.

Policia vijon veprimet procedurale për dokumentimin e plotë të ngjarjes.

/rtsh.al/