Kryetari i Partisë Demokratike, Sali Berisha, ka deklaruar se mbështetja e protestës qytetare përbën një detyrë madhore të PD-së dhe se partia duhet të bëjë çdo përpjekje për ripërtëritjen e saj, në kushte që ai i cilëson si jetike për forcën opozitare.

Në një mbledhje të kryesisë së kësaj force politike, Berisha theksoi se Kuvendi dhe forumet e fundit, të zhvilluara me moton e “Ripërtëritjes”, kanë prodhuar si fryt kryesor, e zgjedhur me votën e demokratëve.

Ai e cilësoi këtë mbledhje si “një apel, një kushtrim” drejtuar çdo anëtari të drejtuesve për t’u afruar me qytetarët, anëtarët dhe mbështetësit.

“Asgjë nuk dëmton, nuk zvogëlon forcën tonë se sa distanca me njerëzit tanë. Kjo është në çdo kohë, por kjo është sot më shumë se kurrë në kushtet në të cilat ne ndodhemi,” tha Berisha.

Ai nënvizoi se është jetike që PD të bëhet funksionale dhe e ripërtërirë, për t’u përballur me eficencë dhe qëndresë me atë që ai e quan “regjim”.

Duke iu referuar protestave të vazhdueshme, kryetari i PD-së deklaroi se partia duhet të mbështesë “një protestë epike në karakterin e saj, e cila po zvarrit Edi Ramën çdo natë në rrugët dhe sheshet e Tiranës”.

Sipas tij, anëtarë dhe mbështetës të shumtë të PD-së janë tashmë pjesëmarrës dhe meritojnë njohje. Ai u bëri thirrje drejtuesve që, me përjashtim të rasteve të veçanta për arsye simbolike, të jenë të pranishëm në protestë bashkë me zgjedhësit dhe anëtarët e tyre.

Berisha vlerësoi se Edi Rama “nuk ka të ardhme” dhe se rënia e tij është e pashmangshme, por se opozita duhet të ngrihet gjithnjë e më fuqishëm.

Ai e cilësoi situatën aktuale si fillim në kushte të favorshme, por edhe të vështira, duke kërkuar kontribut maksimal nga të gjithë.

/rtsh.al/