Gjuha shqipe do të përfshihet në programin akademik të gjuhëve të huaja të Université de Haute-Alsace (Otalzas), në bazë të një marrëveshjeje bashkëpunimi me Universiteti i Shkodrës “Luigj Gurakuqi”. Kjo risi vjen në kuadër të zgjerimit të procesit të ndërkombëtarizimit të Universitetit të Shkodrës.

“Është një risi për universitetin e Shkodrës është gjithashtu risi edhe për vet universitetet franceze pasi për herë të parë ofrohet një modul i gjuhës shqipe si gjuhë e huaj pranë këtyre universiteteve”, u shpreh Prof. As Dhurata Hoxha, Pedagoge e gjuhës frënge UNISHK

Sipas pedagoges së gjuhës frënge në Universitetin e Shkodrës “Luigj Gurakuqi”, Dhurata Hoxha, njëherësh iniciatore e projektit, përfshirja e gjuhës shqipe në kurrikulat e një universiteti francez është mirëpritur si në qarqet akademike franceze, ashtu edhe nga komuniteti shqiptar në Mulhouse.

“Ishte një ngjarje e cila ka lënë mbresa shumë në komunitetin akademik por edhe në komunitetin e qytetit. Në gazetën lokale, faqja e parë e saj i kishte dedikuar këtij lajmi”, tha ajo.

Mësimi i gjuhës shqipe për studentët e këtij universiteti do të nisë me fillimin e vitit akademik 2026–2027 dhe do të zhvillohet online nga pedagogë të Universitetit të Shkodrës. Detajet e kësaj marrëveshjes u dakordësuan gjatë vizitës së një delegacioni me drejtues dhe pedagogë të Universitetit të Shkodrës në Universitetin Haute-Alsace, në Mulhouse të Francës

Gazetar: A. Hoti  

/rtsh.al/