Titaniku po dëmtohet dhe gërryhet nga uji përgjatë viteve. Një ekspeditë e re ka zbuluar ndryshime në strukturën e anijes, kryesisht në parmakun e Titanikut, ku një pjesë e kangjellave të saj mungojnë.

Humbja e parmakut, e përjetësuar nga Jack dhe Rose në skenën e famshme të filmit Titanik, u zbulua gjatë zhytjeve të robotëve nën ujorë dhe krahasimi i fotove të bëra në periudha të ndryshme kohore. Rrënojat e Titanikut po ndryshojnë ngadalë pas më shumë se 100 vjetësh nën ujë.

“Harku i Titanikut është thjesht ikonik, ju i keni të gjitha këto momente në kulturën pop, dhe kjo është ajo që ju mendoni kur mendoni për mbytjen e anijes. Dhe nuk duket më kështu. Është vetëm një kujtim tjetër i përkeqësimit që po ndodh çdo ditë. Njerëzit pyesin gjatë gjithë kohës: ‘Sa kohë do të jetë Titaniku atje?’ Thjesht nuk e dimë, por po e shikojmë në kohë reale”, tha Tomasina Ray, drejtoreshë e koleksioneve në RMS Titanic Inc, kompania që kreu ekspeditën.

Ekipi beson se pjesa e kangjellave, e cila është rreth 4.5 metra e gjatë, ka rënë në dy vitet e fundit. Imazhet dhe një skanim dixhital nga një ekspeditë e vitit 2022 tregojnë se kangjella ishte ende aty.

Struktura metalike e anijes po shkatërrohet nga mikrobet, duke krijuar stalaktite ndryshku dhe pjesë të saj po shemben ngadalë.

/rtsh.al/