Çmimet vijojnë të shtrenjtohen krahasuar me një vitë më parë, pavarësisht ngadalësimit të inflacionit në muajin shtator. Sipas të dhënave të INSTAT-it, në shtator të 2026, Indeksi i Çmimeve të Konsumit u rrit në 2.9% nga 2.4% që ishte në vitin 2025. Teksa inflacioni në muajin gusht të këtij viti shkoi në 3.2%.

Kontributin më të madh e dhanë ushqimet dhe pijet joalkoolike, me 0.96 pikë përqindjeje, të ndjekura nga transporti me 0.81 pikë dhe qiratë me 0.54 pikë përqindjeje.

Krahasuar me shtatorin e vitit të kaluar, rritjen më të lartë e regjistroi transporti, me 12.4%. Shtrenjtimi u vu re edhe te argëtimi dhe kultura, me 5.9%, ndërsa ushqimet dhe pijet joalkoolike u rritën mesatarisht me 2.8%.

Brenda grupit të ushqimeve, peshku u shtrenjtua me 9.6%, perimet me 7.9% dhe mishi me 4.4%. Në të kundërt, veshjet dhe këpucët, si dhe informacioni dhe komunikacioni, shënuan ulje të lehta të çmimeve.

Megjithëse inflacioni mbetet brenda objektivit prej 3% të Bankës së Shqipërisë, pritshmëritë janë për presione të reja në muajt e ardhshëm. Më 7 tetor, guvernatori paralajmëroi se çmimet mund të rriten gjatë gjashtëmujorit të ardhshëm, ndërsa Banka po shqyrton mundësinë e shtrëngimit të politikës monetare përmes rritjes së normës bazë të interesit.

Sipas Bankës së Shqipërisë, presionet e fundit janë nxitur kryesisht nga produktet e importit, shtrenjtimi i të cilave nuk është kompensuar plotësisht nga zhvlerësimi i valutave.

Gazetar: H. Mahmutaj

/rtsh.al/