Shkolla Teknike Pyjore “Kolë Margjini” në Shkodër po njeh rritje të interesit nga të rinjtë, sidomos nga vajzat, në të dy drejtimet që ofron: Pyje dhe Përpunim druri. Këtë vit shkolla ka regjistruar numër më të lartë nxënësish, duke konfirmuar vlerën që arsimi profesional po merr në tregun e punës.

Drejtoresha Albana Lleshaj thekson se disa prej avantazheve të shkollës janë transporti i siguruar, bursa e plotë për nxënësit dhe rrjeti i gjerë i bizneseve partnere, të cilat u krijojnë të rinjve mundësi reale punësimi.

“Fatmirësisht interesi këtë vit ka qenë shumë i lartë nga nxënësit. Ne patëm 45 nxënës të regjistruar vetëm për vitin e parë. Është për t’u përmendur që patëm një rritje të numrit të vajzave dhe çdo vit e më shumë numri i tyre po rritet. Fatmirësisht shkolla ofron shumë për nxënësit, ofron bursë, ofron rimbursim për transport, ofron akomodim në konvikt falas dhe të gjitha këto mundësi i japin një vlerë më të madhe shkollës. Gjithashtu edhe praktikat profesionale i bëjnë të gjitha në biznes dhe kjo është një vlerë e shtuar për shkollën dhe vetë ata, pasi e prekin punën konkrete me duart e tyre” – u shpreh drejtoresha, Albana Lleshaj.

Arsimi pyjor në Shkodër ka traditë të hershme, me fillesat që datojnë në vitin 1959, kur u hap Teknikumi Pyjor dyvjeçar. Nga viti 1963 ky institucion u shndërrua në shkollë të mesme katërvjeçare, duke formuar breza profesionistësh të fushës.

/rtsh.al/