Në prag të të ndeshjes së kampionatit me Dinamon në Shkodër, te Vllaznia ka zhvillime që e trazojnë jo pak ambientin. Vioresin Sinani, drejtori sportiv i klubit kuqeblu, ka dhënë dorëheqjen nga ky post.

Sinani kishte rinovuar kontratën deri në 2028-ën pak kohë më parë, ashtu si trajneri i larguar tashmë, Edi Martini. Por sot është mësuar se ai është larguar, ndërsa klubi nuk ka bërë ende asnjë njoftim zyrtar në lidhje me këtë çështje.

Vendin e Sinanit, sipas medieve lokale të Shkodrës, e ka marrë Alban Hasani (Neziri), ish-futbollisti që mban edhe postin e drejtorit të akademisë së Vllaznisë. Po nga mediet lokale është dhënë lajmi se skuadra ka bojkotuar stërvitjen e sotme.

Trajneri i ri i Vllaznisë, Laszlo, i cili ka vetëm pak ditë që ka nisur punën, është përballur kështu me një situatë aspak komode, ndërkohë që të dielën luhet ndeshja e radhës në kampionat me Dinamon. Pritet që Vllaznia të sqarojë gjithçka zyrtarisht në lidhje me këto zhvillime të fundit.