Festivali “Netët e Klipit Shqiptar” rikthehet këtë vit në ekranin e Radio Televizionit Shqiptar, duke shënuar edicionin e tij të 22-të.

Pas shtatë vitesh të mbajtura në Ulqin, ky event i rëndësishëm muzikor do të kthehet në zemër të Tiranës, duke sjellë një atmosferë të veçantë artistike dhe kulturore në ambientet e Teatrit Kombëtar të Operës dhe Baletit.

“Rikthimi në Studion nr. 1 është një risi, me një studio të rinovuar totalisht. Në 2014-ën kemi bërë një revolucion ato kohë. Ky është një edicion që do të ketë shumë gjëra të veçanta edhe në trajtimin e rubrikave, sepse vetë Klipi ka evoluar qoftë në teknologji, qoftë në raportin e grafikës. Është një gjë që lëviz vazhdimisht,” tregon producenti dhe regjisori i festivalit, Petri Bozo.

Në fillim të muajit maj, RTSH do të nisë transmetimin e programeve të vogla të festivalit, të cilat do të shërbejnë si parapërgatitje dhe prezantim i artistëve dhe klipeve konkurruese.

Këto programe do të sjellin prapaskenat, intervista me artistët dhe pamje ekskluzive të festivalit “Netët e Klipit Shqiptar”.

“Është një festival, i cili përveç vlerave të artistit që prodhon videoklipin, promovon të gjithë pjesën e artistëve mbrapa kamerave. Juria e festivalit të Klipit edhe këtë vit përbëhet nga elementë shumë të njohur të botës së kinemasë, filmit dhe artit shqiptar. Tashmë është shtuar pjesa e grafikës, e stilistëve, sepse ka shumë dinamikë edhe në veshjet e këngëtarëve që performojnë në klipet e tyre,” thotë z. Bozo.

Finalja e madhe do të mbahet më 20 maj dhe pritet të jetë një event madhështor, me pjesëmarrjen e emrave të njohur të muzikës shqiptare, klipeve më të mira të vitit, performancave “live” dhe surprizave të shumta.

Gazetare: Katerina Kule

/rtsh.al/