Pedagogët e Universitetit të Arteve kanë nisur bojkotin e procesit mësimor për ditën e enjte e në shenjë proteste ndaj shkeljeve të vazhdueshme dhe mosrespektim të vendimeve institucionale brenda universitetit.

Përfaqësues të trupës akademike shprehen  se drejtuesit e universitetit nuk po zbatojnë vendimet e komisioneve të promovimit dhe të Senatit Akademik, duke bllokuar proceset e avancimit të stafit me tituj të rinj akademikë.

“Sot stafi pedagogjik i Universitetit të Arteve me mbështetjen e sindikatës ka vendosur të ndërmarrë një ditë bojkot të procesit mësimor. Ky nuk është një veprim kundër studentëve dhe as një reagim i nxituar por një akt i detyruar për të mbrojtur funksionin normal të institucionit dhe respektimit e vendimmarrjes akademike”, u shpreh njëri prej pedagogëve.

“Ne kemi kërkuar një përgjigje që na ka dhënë ministria arsimit komform ligjit se doktoratura për në nuk duhet të jetë kusht, ne kërkojmë vetëm këtë dhe asgjë tjetër”, tha një tjetër pedagog.

Pedagogët  ngritën gjithashtu shqetësimin për detyrimin e pedagogëve që të ndjekin studimet e doktoraturës, pavarësisht vendimeve të mëparshme dhe procedurave të përfunduara për promovim.

Pedagogët theksuan se, nëse situata nuk merr zgjidhje, bojkotit mund t’i bashkohen edhe forma të tjera proteste, ndërsa kërkuan ndërhyrjen e menjëhershme të Ministrisë së Arsimit dhe institucioneve përgjegjëse. Në mbështetje të tyre është shprehur edhe Sindikata e Punonjësve të Universiteteve.

/rtsh.al/