Nxënësit dhe stafi mësimor i shkollës 9-vjeçare “Gaqi Karakashi” në Kuçovë do t’i nisin vitin e ri shkollor në mjedise krejtësisht të reja dhe moderne. Kjo shkollë, falë një investimi të përbashkët mes Ministrisë së Arsimit dhe Sportit dhe Bashkisë Kuçovë, është transformuar plotësisht.

Lajmin e bëri të ditur Kryeministri Edi Rama përmes një postimi në rrjetet sociale, ku ndau pamje nga shkolla e rinovuar. Rama theksoi se ky projekt i shtohet “zinxhirit” të shkollave të reja në mbarë vendin, që po investohet për të garantuar kushte dinjitoze për mësim dhe zhvillim.

Investimi në shkollën “Gaqi Karakashi” është pjesë e një programi më të gjerë të qeverisë, i cili synon të garantojë kushte bashkëkohore për nxënësit dhe mësuesit në të gjithë Shqipërinë, nga veriu në jug. Fokusi i këtij programi është rritja e cilësisë në arsim përmes investimeve të qëndrueshme në shkolla, ambiente sportive dhe ndihmëse. Kjo strategji synon të sigurojë më shumë akses, siguri dhe funksionalitet për të gjitha institucionet arsimore.

/rtsh.al/