Një dron rus ka goditur urën kryesore veriore të Kievit mbi lumin Dniepër, duke plagosur dy persona dhe duke dëmtuar rrugën e kalimit, ndërsa në kryeqytetin ukrainas ndodhej për një vizitë të papritur kancelari gjerman Friedrich Merz. Sulmi ndaj urës, e cila lidh dy brigjet e Kievit dhe përdoret çdo ditë nga mijëra banorë, shënon ditën e katërt radhazi që infrastruktura e urave të kryeqytetit është vënë në shënjestër. Pamjet nga vendngjarja treguan një shpërthim në rrugën e urës, ndërsa automjetet vijonin të lëviznin në zonë. Kryetari i bashkisë së Kievit, Vitali Klitschko, tha se nga sulmi u plagosën dy persona, ndërsa u dëmtua edhe një sistem i furnizimit me ujë të ngrohtë.

Sulmi ndodhi në një moment kur Merz ndodhej në Kiev për të shprehur mbështetjen e Gjermanisë për Ukrainën. Gjatë vizitës, sirenat e alarmit ajror u dëgjuan disa herë në kryeqytet, ndërsa kancelari zhvilloi takime me presidentin ukrainas Volodymyr Zelensky.

Merz njoftoi një paketë të re ndihme ushtarake prej rreth 1 miliard eurosh për Ukrainën, ndërsa 350 milionë euro të tjera do të shkojnë për riparimin e infrastrukturës energjetike. Gjermania dhe Ukraina nënshkruan gjithashtu marrëveshje të reja në fushën e mbrojtjes, përfshirë furnizime me sisteme të mbrojtjes ajrore, radarë dhe dronë përgjues. Një prej objektivave të bashkëpunimit të ri është përballja me dronët rusë me motor reaktiv, të cilët sipas autoriteteve ukrainase kanë rritur presionin mbi mbrojtjen ajrore të Kievit.

Gjatë vizitës, Merz vizitoi edhe Akademinë Kombëtare të Shkencave të Ukrainës, e cila ishte dëmtuar nga një sulm i mëparshëm me dron. Ai i bëri thirrje presidentit rus Vladimir Putin që t’i japë fund luftës dhe deklaroi se Ukraina ka nevojë për mbështetje të fortë në javët e ardhshme. Ndërkohë, Rusia ka deklaruar se sulmet ndaj infrastrukturës ukrainase janë pjesë e një fushate hakmarrëse ndaj sulmeve ukrainase në territorin rus. Ministria ruse e Mbrojtjes tha se ura veriore e Kievit ishte një rrugë e përdorur për transportin e trupave dhe ngarkesave ushtarake. Këto pretendime nuk janë verifikuar në mënyrë të pavarur.

/rtsh.al/