Ka nisur edhe në Universitetin “Fan Stiljan Noli” të Korçës procesi i plotësimit të Sondazhit Kombëtar të Studentëve 2025, i cili do të jetë aktiv deri më 23 maj.

Studentëve u është shpërndarë formulari online dhe aktualisht po vijon një fushatë ndërgjegjësimi për rritjen e pjesëmarrjes së tyre.

Koordinatori institucional për këtë proces, Artur Prifti, thekson se janë organizuar disa takime informuese me studentët, për të theksuar rëndësinë e sondazhit si një mjet që u jep zë dhe ndikim real në përmirësimin e cilësisë së arsimit të lartë.

“Aktualisht jemi në fazën që sondazhi kombëtar studentor është shpërndarë nga agjencia e sigurimit të cilësisë të arsimit të lartë dhe jemi në fazën ku studentët janë duke e plotësuar. Shpërndarja ka nisur nga data 21 prill deri në 23 maj, studentët në adresat e tyre te email mund të gjejnë lekët për ta plotësuar”, tha Koordinatori Institucional, Artur Prifti.

Sipas Priftit, megjithëse nuk ka ende të dhëna të sakta mbi nivelin e plotësimit të sondazhit në universitetin e Korçës, reagimi i parë i studentëve ka qenë pozitiv dhe ka interes për të kontribuar.

“Ne jemi në komunikim të vazhdueshëm me agjencinë, ata do të na njoftojnë për përqindjen  e pyetësorëve të plotësuar dhe më pas do të merren masa”, u shpreh Prifti.

Sondazhi Kombëtar i Studentëve, tashmë në edicionin e tretë, është një ndër nismat më të rëndësishme të Agjencisë së Sigurimit të Cilësisë në Arsimin e Lartë dhe synon të mbledhë opinionin e studentëve për përvojën e tyre akademike.

Rezultatet e mëparshme kanë ndihmuar në identifikimin e problematikave dhe orientimin e politikave të brendshme të institucioneve arsimore.

Gazetare Eftjola Fili

/rtsh.al/