Në një lëvizje që synon të lehtësojë procedurat për agrobiznesin dhe të rrisë standardet e sigurisë ushqimore, qeveria ka rishikuar tarifat e shërbimeve që ofrohen nga institucionet e varësisë së Ministrisë së Bujqësisë dhe Zhvillimit Rural.

Përmes Udhëzimit të Përbashkët, të firmosur nga Ministri i Bujqësisë, Andis Salla, dhe Ministri i Financave, Petrit Malaj, janë përcaktuar rregulla të reja financiare që prekin drejtpërdrejt fermerët, prodhuesit e farërave dhe kompanitë e ambalazhimit të ujit.

Dokumenti, i cili ndryshon udhëzimin bazë të vitit 2022, fokusohet në tre shtylla kryesore. Ndryshimi më i rëndësishëm dhe më lehtësues për sektorin bujqësor është heqja e plotë e tarifave për testimin e varieteteve të reja bimore. Sipas udhëzimit të ri, Enti Shtetëror i Farërave dhe Fidanëve (ESHFF) nuk do të aplikojë asnjë tarifë për testimet që bëhen me qëllim regjistrimin e këtyre varieteteve në Katalogun Kombëtar.

Kjo përjashton nga pagesa edhe testimet e avancuara të bazuara në standardet ndërkombëtare të UPOV (Unioni Ndërkombëtar për Mbrojtjen e Varieteteve të Reja të Bimëve) dhe CPVO. Ekspertët e bujqësisë e vlerësojnë këtë hap si një nxitje thelbësore për përmirësimin gjenetik të bimëve në Shqipëri dhe afrimin e prodhimit vendas me tregjet evropiane.

Filtër i ri për ujin e ambalazhuar

Në një kohë kur konsumi i ujit të ambalazhuar është rritur ndjeshëm, shteti ka vendosur të detajojë dhe standardizojë tarifat për analizat fiziko-kimike të këtij produkti thelbësor. Kjo garanton që çdo markë uji që del në treg t’i nënshtrohet një kontrolli rigoroz laboratorik mbi përbërjen e tij.

Tashmë janë përcaktuar tarifa fikse për 9 tregues specifikë të ujit, ku ndër më kryesorët vlen të përmenden:

Fortësia e përgjithshme e ujit- 800 Lekë

Përmbajtja e klorureve- 700 Lekë

Nivelet e kalciumit dhe magnezit- Nga 600 Lekë secila

Mbetja e thatë (në 180°C)- 720 Lekë

Niveli i pehashit (pH)- 320 Lekë

Gazi karbonik- Nga 200 deri në 650 Lekë, në varësi të metodës (me aparat apo titrim).

Tarifa të reja për etiketimin e prodhimit vendas

Shtylla e tretë e këtij vendimi riorganizon tarifat e certifikimit për materialin mbjellës të prodhuar brenda vendit. Për të shmangur burokracitë dhe për të qartësuar kostot për prodhuesit vendas, udhëzimi unifikon pagesën për lëshimin e etiketave zyrtare.

Nga tani e tutje, certifikimi dhe pajisja me etiketa zyrtare për farërat e bimëve të arave, bimëve foragjere dhe patates, do t’i kushtojë prodhuesve vetëm 500 Lekë për çdo sasi nga 1 deri në 100 kuintalë (kV) të certifikuar.

/rtsh.al/