Kryeministri Edi Rama ka prezantuar përmes rrjeteve sociale projektin më të fundit që synon transformimin rrënjësor të zonave historike të qytetit të Pogradecit. Ky projekt, i cili parashikon restaurimin dhe rigjallërimin e lagjeve tradicionale, pritet t’i japë një hov të ri turizmit gjatë gjithë vitit.

Në mesazhin e tij, kreu i qeverisë theksoi se ky investim do të pasurojë ofertën turistike dhe do të forcojë ekonominë lokale

“Së shpejti, një pol i ri zhvillimi në qytetin liqenor, që do të pasurojë ofertën turistike dhe do të forcojë ekonominë lokale”, shkroi Kryeministri Rama, duke shoqëruar postimin me pamje që tregojnë projektin e detajuar të rilindjes urbane.

Një “Pol i Ri” për turizmin liqenor

Projekti parashikon restaurimin e fasadave, rrugicave me kalldrëm dhe elementeve të tjera arkitekturore që mbartin vlerat historike të Pogradecit. Synimi kryesor është krijimi i një itinerari të ri turistik brenda qytetit, që i nxit vizitorët të eksplorojnë përtej vijës liqenore.

Ky investim vjen në vijim të programit kombëtar të Rilindjes Urbane, i cili ka transformuar disa nga qendrat historike më të rëndësishme në vend, duke i kthyer ato në motorë të fuqishëm të zhvillimit të turizmit kulturor. Për Pogradecin, ky hap shënon një moment kyç për të konkuruar si një destinacion elitar që do të forcojë ekonominë lokale.

/rtsh.al/