Përmeti nuk është më vetëm një destinacion për t’u shijuar për natyrën e tij. Qyteti po tërheq gjithnjë e më shumë vizitorë edhe për vlerat kulturore, ku një nga pikat më të frekuentuara është muzeu i qytetit. Interesi për të po rritet nga dita në ditë, duke e kthyer në një ndalesë të rëndësishme për këdo që viziton këtë zonë.

“Ka pasur tepër interes për të vizituar muzeun si nga vizitorët e huaj ashtu edhe nga ata vendas. Gjithashtu dhe shkollat nuk mbeten pas. Ka pasur një rritje me 50% në krahasim me vitin e kaluar, pra interesi ka qenë më i lartë,” u shpreh Thodhore Jorgji, cicerone.

Sipas cicerones Thodhore Jorgji, fluksi i vizitorëve në muze është i konsiderueshëm gjatë gjithë vitit. Ajo thekson se interesi nuk vjen vetëm nga turistët e huaj, por edhe nga vetë shqiptarët, ndërsa një pjesë e rëndësishme e vizitorëve janë nxënësit e shkollave, të cilët e vizitojnë muzeun në kuadër të aktiviteteve edukative.

“Përsa i përket shkollave, ata janë të interesuar dhe sipas programeve mësimore që ata bëjnë. Nëse i referohemi 28–29 Nëntorit, në këtë periudhë vizitohet pavioni i luftës. Atje ka gjëra interesante përsa i përket historisë së partizanëve që kanë çuar në çlirimin e vendit, konkretisht atë të Përmetit.”

Muzeu i Përmetit mbetet kështu një nga asetet kryesore kulturore të qytetit, duke kontribuar në pasurimin e ofertës turistike dhe në edukimin e brezave të rinj.

Gazetare: Leonida Koçiu

/rtsh.al/