Pas konfirmimit të  një tjetër vatër e murtajës së ruminantëve të vegjël në zonën e Malit të Gjymtit, në njësinë administrative Dajç, shërbimi veterinar ka vijuar punën me asgjësimin e tufës. Përgjegjësi i Shërbimit Veterinar, Mark Preçi, bën me dije se është infektuar edhe ferma ngjitur me rastin e 3 ditëve më parë, duke e çuar në 110 krerë totalin e prekur.

“Përvec konfirmimit të fermës së parë të infektuar është dhe një fermë ngjitur me të e cila ka rezultuar pozitiv. Tregu i kafshëve të imëta momentalisht është i bllokuar sipas urdhrit të ministrisë dhe nuk do të lejohet tregtimi i kafshëve të imëta”, u shpreh Preçi.

Nga ana tjetër, Shërbimi Veterinar thekson se ende nuk është përcaktuar burimi i infeksionit, për shkak të mungesës së gjurmueshmërisë mbi lëvizjet e kafshëve në fermat e prekura.

“Nuk është konstatuar që në fermën në fjalë të ketë pasur lëvizje kafshësh”, tha ai.

Autoritetet sqarojnë se fermerët që kanë kryer matrikullimin e bagëtive do të përfitojnë dëmshpërblim, në përputhje me kuadrin ligjor në fuqi.

“Ministria ka përfshirë planin e zhdëmtimit, por kjo do të jetë e lidhur me faktin se nëse fermerët nuk do të jenë korrekt përsa i përket matrikullimit nuk do të dëmshpërblehen”, tha Përgjegjësi i Shërbimit Veterinar.

Zona e Malit të Gjymtit numëron vetëm katër ferma të blegtorisë së imët, ndërsa si masë parandaluese, tregjet e kafshëve të imta vijojnë të jenë të mbyllura.

Gazetare: M. Gjoni  

/rtsh.al/