Këshilli i Ministrave ka miratuar dy vendime të rëndësishme që synojnë nxitjen e investimeve dhe zhvillimin e qëndrueshëm territorial përmes zbatimit të ligjit të ri nr. 20/2025, i njohur si “Paketa e Maleve”. Me propozim të Ministrit të Shtetit për Pushtetin Vendor, qeveria ka shpallur një sërë territoresh në Bashkitë Gjirokastër dhe Fier si “Zona me përparësi zhvillimin e ekonomisë malore”, duke u hapur rrugën projekteve ekonomike, industriale dhe turistike.

Gjirokastra, fokus te turizmi dhe tradita lokale

Në Bashkinë e Gjirokastrës, vendimi përfshin 9 zona specifike të shtrira në disa njësi administrative, ku peshën kryesore sipërfaqësore e mban njësia Cepo. Këto zona do të shërbejnë si pole për thithjen e kapitaleve të huaja dhe vendase, me fokus të veçantë te turizmi rural dhe agropërpunimi.

Ndarja sipas territoreve dhe sipërfaqeve për Gjirokastrën përcaktohet si vijon:

Fieri, ndërhyrje masive në mbi 16 mijë hektarë

Ndryshe nga Gjirokastra, ku ndërhyrjet janë më të lokalizuara, vendimi për Bashkinë e Fierit përfshin një sipërfaqe masive që kalon pragun e 16,000 hektarëve, e shtrirë në pothuajse të gjitha njësitë administrative fundore të rrethit. Pllaja e Cakranit mban sipërfaqen më të madhe me rreth 6,100 hektarë të futur në këtë regjim të ri ekonomik.

Dokumenti zyrtar specifikon shtrirjen gjeografike për qarkun Fier:

“Shpallen zona me përparësi zhvillimi në Fier: Zona 1 në Libofshë (1,198 ha); Zona 2 në Cakran (6,100 ha); Zona 3 në Dërmenas (863 ha); Zona 4 në Frakull (2,181 ha); Zona 5 në Levan (2,547 ha); Zona 6 në Mbrostar Ura (542 ha); Zona 7 në Portëz (2,488 ha) dhe Zona 8 në njësinë Qendër (346 ha).”

Profilizimi i aktiviteteve dhe zbatimi në terren

Për të dyja bashkitë, Këshilli i Ministrave ka përcaktuar qartë tre fazat e aktiviteteve që do të lejohen dhe stimulohen me lehtësi fiskale apo administrative në këto territore:

Aktivitete të zhvillimit ekonomik (përfshirë shërbimet dhe tregtinë e gjelbër).

Aktivitete të zhvillimit industrial (përpunim i lehtë, prodhim energjie apo manifakturë).

Aktivitete të zhvillimit turistik (resorte malore, ekoturizëm dhe agroturizëm).

Për sa i përket anës ekzekutive, janë ngarkuar tri struktura kryesore për të ndjekur zbatimin e menjëhershëm:

“Ngarkohen Ministria e Ekonomisë dhe Inovacionit, Agjencia Shtetërore e Kadastrës dhe Bashkitë përkatëse Gjirokastër dhe Fier për zbatimin e këtij vendimi.”

Vendimet hyjnë në fuqi menjëherë pas botimit të tyre në Fletoren Zyrtare.

/rtsh.al/