Shiroka vijon të jetë një nga destinacionet më të frekuentuara gjatë fundjavave nga qytetarët shkodranë dhe vizitorë të ardhur nga zona të ndryshme të vendit. E vendosur në brigjet e liqenit, kjo zonë turistike tërheq çdo javë dhjetëra familje dhe të rinj që zgjedhin të kalojnë kohën e lirë pranë natyrës.

Qetësia, ajri i pastër dhe panorama e liqenit janë ndër arsyet kryesore që i bëjnë vizitorët t’i drejtohen Shirokës. Qytetarët shprehen se kjo zonë mbetet një nga perlat e turizmit në Shkodër, duke ofruar mundësi për relaks, shëtitje dhe argëtim për të gjitha grup moshat.

“Shiroka është një vend shumë i bukur, është i frekuentueshëm, argëtohen”, tha një qytetar.

“E preferoj Shirokën dhe e shijoj shumë”, tha një tjetër qytetar.

Përveç bukurive natyrore, gastronomia tradicionale dhe gatimet me peshk vazhdojnë të jenë një tjetër atraksion për turistët.

Me peizazhin e veçantë, mikpritjen dhe pozicionin e favorshëm pranë qytetit të Shkodrës, Shiroka vazhdon të mbetet një zgjedhje e preferuar për ata që kërkojnë të kalojnë një fundjavë të qetë pranë natyrës.

Gazetar: M. Rakaj   

/rtsh.al/