Bujqësia dhe blegtoria mbeten burimi kryesor i të ardhurave për banorët e fshatit Dërsnik. Puna në tokë dhe rritja e bagëtive sigurojnë jetesën e dhjetëra familjeve, të cilat vazhdojnë të ruajnë traditën e tyre ndër vite.

“Këtu kemi qershinë që e kemi të sezonit edhe ka në mënyrë të konsiderueshme. Ato më cilësoret ikën i morën për tregun. Kurse ato që nuk ishin aq cilësore i morën për lëng. Do të thotë që sivjet nuk mbeti as edhe një qershi pa shitur. Prodhimi ishte i kënaqshëm, i bollshëm, pak vështirësi në mungesë të punëtorëve. Jemi në prag të fillimit të vjeljes. Ka edhe blegtori një çik më shumë Dërsnik”, tha Mehmet Zaçe, Kryetar i fshatit Dërsnik.

Edhe blegtoria mbetet një aktivitet i rëndësishëm për familjet e fshatit, duke siguruar të ardhura nga prodhimi i qumështit, mishit dhe nënprodukteve të tjera. Banorët kërkojnë më shumë mbështetje për sektorin, si në drejtim të subvencioneve, ashtu edhe të krijimit të tregjeve të sigurta për shitjen e prodhimeve.

“Ne kemi zgjedhur dhentë me ato jemi marrë tërë jetën. 60 krerë se je pensionistë tani s’mbajmë dot më tepër”, tha një banor.

Kryetari i fshatit Dërsnik thotë se zhvillimi i mëtejshëm i këtyre sektorëve është thelbësor për të mbajtur gjallë ekonominë e fshatit dhe për të frenuar largimin e të rinjve.

/RTSH/