Në rajonin e Irkutskut, në Siberi është ngritur alarmi pas vdekjes së një 28-vjeçareje që punonte në Institutin Kërkimor Kundër Murtajës. Rreth 200 persona që mund të kenë pasur kontakt me të janë vendosur nën vëzhgim mjekësor, ndërsa disa spitale janë futur në karantinë.

Darya Shipilova u shtrua në spital më 29 shtator me simptoma të rënda të pneumonisë dhe ndërroi jetë në fillim të tetorit. Sipas raportimeve të mediave të pavarura ruse, ajo mund të jetë ekspozuar ndaj bakterit të murtajës pulmonare pasi kishte thyer aksidentalisht një epruvetë gjatë punës në laborator më 25 shtator. Ky version nuk është konfirmuar zyrtarisht nga autoritetet.

Pas vdekjes së saj, autoritetet vendosën në izolim më shumë se 60 punonjës të institutit dhe nisën gjurmimin e personave që kishin pasur kontakt me 28-vjeçaren. Sipas raportimeve, rreth 189 persona janë vendosur në spitale ose nën mbikëqyrje mjekësore.

Tre spitale klinike në Irkutsk, si dhe disa struktura të tjera shëndetësore në zonën përreth, janë vendosur nën masa karantine. Autoritetet kanë marrë këto masa si masë paraprake, ndërsa deri tani nuk janë konfirmuar raste të tjera të murtajës.

Instituti ku punonte Shipilova merret me kërkimin e sëmundjeve dhe patogjenëve të rrezikshëm. Sipas raportimeve lokale, incidenti mund të ketë ndodhur gjatë punës me materiale biologjike që përmbanin bakterin *Yersinia pestis*, shkaktari i murtajës.

Megjithatë, autoritetet ruse kanë mohuar deri tani se ka prova që 28-vjeçarja të ketë pasur murtajë. Shërbimi rus për mbrojtjen e konsumatorit dhe shëndetin publik, Rospotrebnadzor, deklaroi se ajo ishte diagnostikuar me “pneumoni me origjinë të panjohur” dhe se testet nuk kishin zbuluar mikroorganizma të lidhur me punën e saj në institut.

Guvernatori i rajonit të Irkutskut, Igor Kobzev, tha se situata sanitare dhe epidemiologjike në rajon është aktualisht e qëndrueshme. Ndërkohë, autoritetet amerikane kanë deklaruar se po e monitorojnë nga afër situatën, por nuk e konsiderojnë aktualisht një arsye për alarm.

Murtaja pulmonare është një formë e rëndë e sëmundjes që mund të transmetohet nga personi në person përmes pikave të frymëmarrjes dhe mund të jetë fatale nëse nuk trajtohet shpejt me antibiotikë. Megjithatë, deri tani nuk ka prova të konfirmuara për një përhapje të sëmundjes nga personi në person në këtë rast.