Strategic Group. dhe Ocean B Holding, me seli në Katar, kanë nënshkruar një kornizë bashkëpunimi strategjik që synon identifikimin, zhvillimin dhe avancimin e mundësive për investime kapitale publike dhe private në Kosovë dhe Shqipëri, me një portofol të synuar investimesh deri në 2 miliardë dollarë amerikanë.

Në kuadër të këtij bashkëpunimi, Ocean B Holding ka autorizuar zyrtarisht Strategic Group që të përfaqësojë interesat e saj investuese dhe të avancojë mundësi strategjike në Kosovë, Shqipëri, Mal të Zi, Maqedoni Veriore dhe tregje të tjera të Evropës Juglindore. Mandati i jep Strategic Group të drejtën të identifikojë dhe vlerësojë mundësi investimi, të angazhohet me qeveritë dhe aktorët e sektorit privat, të organizojë takime të nivelit të lartë dhe të lehtësojë diskutimet dhe negociatat lidhur me investimet potenciale.

Partneriteti do të fokusohet në sektorë me potencial për ndikim të rëndësishëm dhe afatgjatë ekonomik, përfshirë energjinë, naftën dhe gazin, minierat, prodhimin e energjisë elektrike, shëndetësinë dhe zhvillimin e infrastrukturës së madhe. Ocean B Holding bashkëpunon ndërkombëtarisht me investitorë, institucione financiare, partnerë strategjikë dhe qeveri për të identifikuar, zhvilluar, financuar dhe zbatuar projekte të përmasave të mëdha.

“Misioni i Strategic Group, në thelb, ka të bëjë me njerëzit. Ne duam të sjellim kapital serioz ndërkombëtar, investitorë kredibilë dhe partneritete afatgjata në Kosovë dhe Shqipëri, në mbështetje të qeverive, ekonomive dhe sektorëve privatë të të dyja vendeve,” deklaroi Arianit Shehu, pronar i Strategic Group. “Për ne, investimi nuk matet vetëm me madhësinë financiare të një transaksioni. Ai matet me numrin e vendeve të reja të punës që krijohen, familjet që përfitojnë, bizneset që zhvillohen dhe fuqizimin e ekonomive tona. Në të njëjtën kohë, jemi të përkushtuar të mbështesim mundësi për sektorin privat në Mal të Zi dhe Maqedoninë e Veriut, sepse prosperiteti më i madh në të gjithë rajonin na fuqizon të gjithëve.”

“Kosova dhe Shqipëria kanë potencial të jashtëzakonshëm. Përgjegjësia jonë është të ndihmojmë që ky potencial të shndërrohet në fabrika, projekte energjetike, infrastrukturë, investime në shëndetësi, biznese të reja dhe, mbi të gjitha, vende të qëndrueshme pune. Një portofol investimesh prej 2 miliardë dollarësh mund të ketë ndikim transformues kur kapitali drejtohet në projekte që krijojnë vlerë ekonomike afatgjatë. Ky bashkëpunim përfaqëson një hap tjetër drejt fuqizimit të lidhjeve ndërmjet kapitalit ndërkombëtar dhe Ballkanit Perëndimor, duke vendosur Kosovën dhe Shqipërinë në qendër të një gjenerate të re projektesh strategjike të orientuara drejt rritjes ekonomike, punësimit, zhvillimit të infrastrukturës dhe prosperitetit rajonal”, tha Arianit Shehu

Strategic Group është kompani me seli në Kosovë, e specializuar në zhvillimin e biznesit, lehtësimin e investimeve dhe krijimin e partneriteteve strategjike ndërmjet Ballkanit Perëndimor dhe Lindjes së Mesme. Ocean B Holding, me seli në Katar, është kompani ndërkombëtare investimesh dhe zhvillimi projektesh në sektorë strategjikë, me një portofol investimesh prej disa miliardë dollarësh në Lindjen e Mesme dhe Afrikë. Partneriteti synon të sjellë kapital ndërkombëtar dhe investime strategjike në Kosovë, Shqipëri dhe rajon./KosovaPress/

/rtsh.al/