Pavarësisht rinisjes së seancës plenare pas një pushimi prej 10 minutash, punimet në Kuvend janë ndërprerë sërish për shkak të tensioneve mes opozitës dhe kryeparlamentarit Niko Peleshi.

Deputetët e opozitës vijojnë të mbajnë të bllokuar foltoren e Kuvendit, duke kërkuar që fjalën ta marrë kreu i Partisë Demokratike, Sali Berisha. Ky i fundit është përjashtuar nga e drejta e fjalës për të gjithë kohëzgjatjen e seancës së sotme, pas thirrjeve të vazhdueshme që, sipas kryeparlamentarit, nxisnin dhunë ndaj deputetëve socialistë.

Pavarësisht thirrjeve të përsëritura të Peleshit për lirimin e foltores dhe vijimin normal të punimeve, opozita nuk është tërhequr nga qëndrimi i saj. Për këtë arsye, kryeparlamentari ka vendosur sërish ndërprerjen e seancës, duke bërë të ditur se punimet nuk do të vijojnë deri në lirimin e foltores.

Gjatë fjalës së tij, Berisha iu drejtua deputetëve të Partisë Socialiste me tone të ashpra, duke deklaruar: “Ju meritoni gazin lotsjellës dhe plumbat e gomës”.

Përplasjet mes opozitës dhe drejtuesit të seancës kanë vijuar edhe pas pushimit të shkurtër, duke bllokuar punimet parlamentare.

/rtsh.al/