Në kuadër të një tjetër faze të operacionit ndërkombëtar të koduar “The Wanted”, Policia e Shtetit njofton se është kryer me sukses ekstradimi nga Spanja drejt Shqipërisë i shtetasit të kërkuar, Arnold Jaho, 41 vjeç, i lindur në Vlorë.

Procedura e ekstradimit u realizua nga qyteti i Barcelonës, si rrjedhojë e bashkëpunimit të drejtpërdrejtë ndërmjet specialistëve të Drejtorisë së Interpolit dhe homologëve të tyre në Madrid. Shtetasi i ekstraduar ishte shpallur në kërkim ndërkombëtar pasi përballet me disa vendime gjyqësore dhe akuza për vepra të ndryshme penale, që nga krimet ekonomike e deri te ato kundër personit.

Sa i përket historikut gjyqësor, Gjykata e Tiranës e ka dënuar 41-vjeçarin në vitin 2026 me “6 vjet burgim për veprat penale ‘Pastrimi i produkteve të veprës penale ose veprimtarisë kriminale’ dhe ‘Fshehja e të ardhurave'”, ndërkohë që më parë, në vitin 2024, ai ishte dënuar me “1 vit burgim, për veprën penale ‘Mashtrimi'”.

Përveç dënimeve ekzistuese, për këtë shtetas kishte edhe masa aktive ndalimi. Prokuroria e Tiranës kishte lëshuar ndaj tij një urdhër ndalimi në vitin 2025, i cili lidhej me hetimet për veprat penale “Heqja e paligjshme e lirisë” dhe “Mbajtja pa leje dhe prodhimi i armëve, armëve shpërthyese dhe i municionit”.

Materialet përkatëse dhe shtetasi i ekstraduar i janë kaluar autoriteteve të drejtësisë për vuajtjen e dënimeve dhe vijimin e procedurave të mëtejshme penale.

Akuzat

Arnold Jaho akuzohet për disa vepra penale, të lidhura me një ngjarje të bujshme të ndodhur në janar të vitit 2025 në zonën e Astirit në Tiranë. Ai u shpall në kërkim nga Policia e Shtetit së bashku me katër persona të tjerë.

Akuzat kryesore që rëndojnë mbi të dhe bashkëpunëtorët e tij janë:

• Heqja e paligjshme e lirisë (e kryer në bashkëpunim), pasi akuzohen se kanë mbajtur të mbyllur një vajzë 21-vjeçare në një apartament të marrë me qira ditore.
• Mbajtja pa leje dhe prodhimi i armëve, armëve shpërthyese dhe i municionit, pasi gjatë ndërhyrjes së forcave RENEA dhe kontrolleve në ambientet e tyre u gjetën armë zjarri dhe municione luftarakë.
• Prodhimi dhe shitja e narkotikëve, akuzë e cila u shtua pas dëshmive dhe hetimeve të mëtejshme, pasi në vendngjarje u gjetën gjurmë të lëndëve narkotike (kokainë).
• Falsifikimi i dokumenteve.

Rrethanat e ngjarjes te Astiri

Ngjarja nisi pas një denoncimi për ndihmë nga një 21-vjeçare, gjë që solli ndërhyrjen e forcave speciale RENEA për të hyrë në apartament. Sipas hetimeve të policisë, personat e përfshirë po konsumonin alkool dhe lëndë narkotike përpara se situata të shkallëzohej. Pasi vajza pësoi kriza paniku dhe alarmoi autoritetet, djemtë u larguan nga banesa duke e lënë atë të mbyllur brenda.

/rtsh.al/