Përballë një numri në rritje të ngjarjeve kibernetike që synojnë infrastrukturën publike dhe private në Evropë — nga bllokimi i sistemeve të ftohjes në supermarkete deri te pengesat në kontrollin e trafikut ajror — Bashkimi Evropian i ka përcjellë qeverive anëtare, një manual strategjik për përballimin e emergjencave hibride.

Dokumenti zyrtar, i nënshkruar nga Komisionerja Evropiane për Përgatitjen dhe Menaxhimin e Krizave, Hadja Lahbib, parashtron nevojën për kundërmasa imediate dhe stërvitjen e popullsisë për të përballuar goditjet e mundshme.

Në hyrje të udhëzuesit, Lahbib nënvizon se “Bashkimi Evropian përballet me një peizazh gjithnjë e më kompleks rreziqesh, të përcaktuar nga linjat e reja gjeopolitike, ndryshimet klimatike, inovacioni i shpejtë teknologjik dhe presionet mbi qëndrueshmërinë demokratike e kohezionin social”.

Në qendër të këtij manuali qëndron koncepti i vetëmjaftueshmërisë afatshkurtër, ku vendoset si kusht “si t’i rezistosh një sulmi serioz për të paktën tre ditë”.

Për të parandaluar pasojat e ndërprerjes së energjisë elektrike, rrjeteve të komunikimit apo furnizimit në spitale e rrjete tregtare, BE-ja rekomandon krijimin e rezervave individuale bazë. Ndër masat e përcaktuara renditen ujë i pijshëm, ushqime të konservuara, drita me bateri, si dhe “para në dorë, kartëmonedha dhe monedha të vogla për blerjet thelbësore shtëpiake”.

Udhëzimet evropiane nuk kufizohen vetëm në rrafshin logjistik, por i bëjnë thirrje shteteve anëtare të nisin fushata të zgjeruara ndërgjegjësimi publik. Kjo përfshin organizimin e takimeve informuese në shkolla, përdorimin e figurave me ndikim publik dhe transmetimin e mesazheve që nxisin përgatitjen pa shkaktuar panik.

Masa të tilla parandaluese reflektojnë shqetësimin në rritje të institucioneve evropiane ndaj sulmeve të shpeshtuara kibernetike, duke synuar rritjen e qëndrueshmërisë publike dhe mbrojtjen e infrastrukturave kritike në mbarë bllokun.

/rtsh.al/