Pas përmbytjeve të ditëve të fundit, në Zhelizhan të Lushnjës janë konstatuar dëme të konsiderueshme, sidomos në serat dhe tokat e vëllezërve Naun dhe Trifon Shtëmbari, të cilëve lumi Seman u shkatërroi të mbjellat pas daljes nga shtrati.

“Serat dhe agrumet nuk bëhen fare, kjo është zonë e mbytur”, u shpreh Naun Shtëmbari.

Bashkia e Lushnjës ka qenë në gatishmëri gjatë reshjeve, ndërsa drejtori i Emergjencave Civile, Avni Begolli, thotë se po kryhen verifikimet dhe në fund do të vendoset për dëmshpërblimet. Ai thekson se përmbytjet kanë prekur vetëm zonat brenda argjinaturave.

“Në bashkëpunim me Ndërmarrjen e Pasurisë Publike dhe jo vetëm kemi ndërhyrë në kohë reale për të normalizuar situatën. Kemi pasur probleme në disa biznese dhe familje në fshatin Savër dhe është bërë ndërhyrja e menjëhershme për normalizim të situatës”, u shpreh Avni Begolli, drejtor i EC, Bashkia Lushnje.

Fermerët kërkojnë vlerësim të menjëhershëm të humbjeve, për një mundësi kompensimi, pasi dëmet janë të parikuperueshme.

/rtsh.al/