Dyshohen se ndihmuan Ergys Agasin, GJKKO lë në burg shefin e Policisë Shkencore dhe kryekamarierin
GJKKO ka lënë në burg shefin e Policisë Shkencore, Fatjon Kalluçi, dhe kryekamarierin Embro Sulejmani, të dyshuar për përkrahjen e Ergys Agasit gjatë kohës që ai ishte në kërkim.
Seanca për verifikimin e masës së sigurimit dhe marrjen në pyetje të dy të arrestuarve u zhvillua sot në Gjykatën e Posaçme.
Sipas të dhënave të hetimit, Fatjon Kalluçi, me detyrë shef i Policisë Shkencore, dyshohet se gjatë muajit gusht, përpara arrestimit të Ergys Agasit, i ka dërguar atij tre fotografi që lidhen me ekspertizën e automjetit “Land Rover Defender” me targë GG444AA, i cili ishte gjetur në ambientet e një biznesi.
Ndërkohë, Embro Sulejmani, i cili punonte si kryekamarier në një lokal, dyshohet se i dërgonte ushqime në banesën ku Agasi qëndronte i fshehur.
Sipas hetuesve, gjurmët për këto veprime janë gjetur në telefonin e Ergys Agasit dhe janë administruar si pjesë e hetimit.
Ndërkohë, sot në orën 12:00 është planifikuar edhe seanca për marrjen në pyetje të ish-drejtoreshës së SHISH-it, Vlora Hyseni, në kuadër të të njëjtit zhvillim hetimor.
/rtsh.al/
Të gjitha të drejtat e këtij materiali janë pronë ekskluzive dhe e patjetërsueshme e RTSH, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e RTSH, në të kundërt çdo shkelës do mbajë përgjegjësi sipas nenit 179 të Ligjit 35/2016.
Të ngjashme
Të fundit
