Apple ka prezantuar iPhone Duo, telefonin e parë të palosshëm të kompanisë, duke sjellë ndryshimin më të madh në linjën e iPhone-ve që prej heqjes së butonit fizik Home me iPhone X në vitin 2017.

Duo ka përmasa të ngjashme me një pasaportë dhe, kur hapet, shndërrohet në një ekran të gjerë horizontal që mund të përdoret edhe në orientim vertikal. Kur është i mbyllur, pajisja përdor një ekran më të vogël në pjesën e përparme. Apple e cilësoi Duo-n si iPhone-in më të hollë të prodhuar ndonjëherë kur është i hapur.

Prezantimi i Apple u bë nën drejtimin e CEO-së së ri, John Ternus, pas kalimit të stafetës nga Tim Cook. Ternus e vendosi inteligjencën artificiale në qendër të prezantimit, duke theksuar privatësinë dhe përpunimin e të dhënave direkt në pajisje përmes Apple Intelligence.

Kompania prezantoi gjithashtu një version të përditësuar të Siri-t, i cili, sipas Apple, do të jetë në gjendje të ndërveprojë me rreth 300 mijë aplikacione.

Në event u zbuluan edhe iPhone 18 Pro dhe iPhone 18 Pro Max, me çmime fillestare përkatësisht 1,199 dhe 1,299 dollarë. Modelet e reja përdorin çipin A20 Pro, i cili sjell përmirësime të orientuara edhe drejt funksioneve të avancuara të inteligjencës artificiale.

Apple njoftoi gjithashtu një standard të ri, të quajtur “Apple Reference Image”, për të ndihmuar në verifikimin e autenticitetit të fotografive të realizuara me iPhone. Kompania tha se do të mbështesë edhe SynthID, teknologjinë për identifikimin e imazheve të krijuara ose të modifikuara me inteligjencë artificiale. Ky funksion nuk do të jetë i disponueshëm në Bashkimin Evropian dhe Kinë.

Në të njëjtin event, Apple prezantoi modele të reja të AirPods dhe Apple Watch Series 12 dhe Ultra 4, me fokus të shtuar te anulimi i zhurmës, shëndeti, monitorimi i rrahjeve të zemrës dhe matja e rikuperimit fizik.

/rtsh.al/