Komisioni për Ekonominë, Punësimin dhe Financat, nën drejtimin e kryetares Milva Ekonomi, miratoi sot një projektligj që synon të sjellë ndryshime rrënjësore në mënyrën se si do të ndërtohen dhe operohen portet turistike në vend. Nisma ligjore, e propozuar nga deputetja Zamira Sinaj, parashikon një trajtim të veçantë për projektet që gëzojnë statusin e investitorit strategjik.

Përjashtim nga garat e zakonshme konkurruese

Në thelb të kësaj shtese në ligjin nr. 9710, datë 10.4.2007 “Për portet turistike”, qëndron krijimi i një “autostrade” procedurale për investitorët e mëdhenj. Sipas relatores së nismës, Sinaj, subjektet që janë certifikuar si investitorë strategjikë do të mund të përjashtohen nga procedurat e zakonshme konkurruese (tenderat apo ankandet publike) për ndërtimin dhe operimin e porteve turistike.

Objektivat kryesore të ndryshimit janë eliminimi i burokracive të gjata për projekte me impakt të lartë në ekonomi; inkurajimi i ndërtimit të marinave moderne dhe porteve turistike përgjatë vijës bregdetare; krijimi i një kuadri të veçantë që integron ligjin e porteve me atë të investimeve strategjike.

Diskutimet dhe relatimi

Projektligji u relatua nga deputeti Adi Qose, i cili theksoi se këto ndryshime vijnë si nevojë për të harmonizuar legjislacionin aktual me dinamikat e reja të ekonomisë shqiptare. Gjatë mbledhjes, anëtarët e komisionit diskutuan mbi garancitë që shteti duhet të ketë në këto kontrata dhe rëndësinë e mbikëqyrjes së këtyre porteve pas ndërtimit.

“Synojmë të krijojmë një trajtim të veçantë që lehtëson rrugën për ata investitorë që kanë dëshmuar kapacitete financiare dhe strategjike për të transformuar turizmin bregdetar,” u shpreh Sinaj gjatë prezantimit.

Pas sesionit të pyetjeve, ku u kërkuan sqarime mbi kriteret e përzgjedhjes dhe transparencën e proceseve, Komisioni i Ekonomisë e miratoi projektligjin në parim, nen për nen dhe në tërësi. Tashmë, nisma ligjore do t’i kalojë seancës plenare për votim përfundimtar.

/rtsh.al/