Ish-presidenti i Koresë së Jugut, Yoon Suk Yeol, është dënuar me 30 vjet burg nga Gjykata Qendrore e Seulit, pasi u shpall fajtor për dërgimin e dronëve në hapësirën ajrore të Koresë së Veriut në vitin 2024.

Prokurorët argumentuan se operacioni me dronë ishte pjesë e një përpjekjeje për të krijuar tensione ushtarake me Korenë e Veriut dhe për të justifikuar shpalljen e mëvonshme të gjendjes së jashtëzakonshme (ligjit ushtarak) nga Yoon në fund të vitit 2024. Gjykata konstatoi se ai kishte bashkëpunuar në planifikimin e inkursionit me dronë dhe e shpalli fajtor për shpërdorim detyre dhe veprime që cenonin sigurinë kombëtare.

Sipas akuzës, dronët fluturuan mbi kryeqytetin e Koresë së Veriut, Pyongyang, për të shpërndarë materiale propagandistike. Autoritetet e Koresë së Veriut e denoncuan incidentin, duke akuzuar Seulin për provokim.

Yoon i ka mohuar akuzat. Avokatët e tij deklaruan se ai nuk kishte urdhëruar dhe as miratuar operacionin, duke argumentuar se fluturimet ishin një përgjigje ndaj balonave me mbeturina që Koreja e Veriut kishte dërguar drejt Jugut për muaj me radhë.

Ky vendim vjen pas një tjetër goditjeje të rëndë ligjore për ish-presidentin. Më herët gjatë vitit 2026, ai ishte dënuar edhe me burgim të përjetshëm për rolin e tij në shpalljen e ligjit ushtarak, që shkaktoi krizën më të madhe politike në Korenë e Jugut në dekada.

Yoon ndodhet tashmë në paraburgim dhe ka të drejtë të apelojë vendimin. Ndërkohë, pas shkarkimit të tij nga posti nga Gjykata Kushtetuese e Koresë, zgjedhjet e parakohshme u fituan nga presidenti aktual, Lee Jae Myung.

Ngjarja ka tërhequr vëmendje ndërkombëtare, pasi marrëdhëniet mes Koresë së Jugut dhe Koresë së Veriut mbeten shumë të tensionuara dhe dy vendet teknikisht janë ende në gjendje lufte që nga konflikti i viteve 1950.