Teksa na ndajnë vetëm pak ditë nga hapja zyrtare e aplikimeve për skemat mbështetëse, shërbimi veterinar në Shkodër ka zbritur në terren duke orientuar fermerët në kryerjen e këtij procesi. Sipas përgjegjësit Mark Preçi, matrikullimi i bagëtive krahas garantimit të sigurisë është kusht në përfitimin e skemave të subvencioneve.

“Ky është një proces i shtrirë gjatë të gjithë vitit, por momentalisht kur jemi në prag të aplikimeve të subvencioneve bëhet edhe më i domosdoshëm matrikullimi”, u shpreh Preçi.

Vitin e shkuar ka pasur fermerë të cilët janë penalizuar nga përfitimi i granteve pasi kanë matrikulluar bagëtitë pas aplikimit në këto skema gjë që ka bërë përjashtimin e tyre.

“Vitin e kaluar ka pasur raste që fermer të ndryshëm nuk kanë përfituar mbështetje financiare vetëm prej faktit sepse ato kanë kryer procesin e matrikullimit vetëm mbasi ato kanë kryeraplikimin”, u shpreh ai.

Në qarkun Shkodër janë rreth 32 mijë ferma të regjistruara prej të cilave vetëm 18 mijë janë aktive. Identifikimi individual i kafshëve dhe regjistrimi i fermave blegtorale në RUDA, është hapi i parë i formalizimit të sektorit dhe siguron gjurmueshmërinë e shëndetit të kafshëve dhe produkteve me origjinë shtazore.

Gazetar: M. Gjoni  

/rtsh.al/