Krijimi i një paketë të gjelbër për shfrytëzimin e qëndrueshëm të Liqeni i Shkodrës në funksion të turizmit dhe komunitetit lokal ka qenë në fokus të një projekti dyvjeçar, të zbatuar në kuadër të Programit të Bashkëpunimit për Zhvillimin Italo–Shqiptar.

Ndërhyrjet e Agjencia Kombëtare e Zonave të Mbrojtura, e cila drejtoi projektin, janë përqendruar në menaxhimin e qëndrueshëm të aktivitetit turistik, me qëllim mbrojtjen e mjedisit dhe nxitjen e turizmit. Gjatë zbatimit të projektit janë evidentuar disa problematika, kryesisht ndotja mjedisore dhe peshkimi i paligjshëm, të cilat vijojnë të mbeten sfida për ekosistemin e liqenit.

“Duke qenë se është një zonë kufitare problematikat e saj janë të mëdha, kryesisht kemi ndotje nga ujërat e zeza dhe të gjitha gropat septike që ndodhen të gjitha ndërtimet apo bujtinat rreth Liqenit të Shkodrës”, u shpreh Agim Dardha, Drejtor i ADZM Shkodër.

Sipas përfaqësuesve të Agjencisë Kombëtare të Zonave të Mbrojtura, projekti ka synuar jo vetëm mbrojtjen e pasurisë natyrore, por edhe krijimin e një modeli zhvillimi që garanton përfitime afatgjata për komunitetin lokal.

“Janë bërë investime në infrastrukturë dhe në blerje pajisje për pastrimin e liqenit”, tha Holta Çopani, Koordinatore e projektit, AKZM.

“Zgjidhje Mjedisore dhe Turistike për Liqenin e Shkodrës” ishte projekti I radhës me fokus forcimin e bashkëpunimit mes institucioneve, ekspertëve dhe komunitetit, duke e promovuar liqenin si një destinacion me vlera të veçanta natyrore dhe me potencial të rëndësishëm për zhvillimin e eko-turizmit në rajon.

Gazetar: A. Hoti   

/rtsh.al/