Ministri i Bujqësisë dhe Zhvillimit Rural, Andis Salla, zhvilloi një bashkëbisedim me operatorë turistikë, fermerë dhe përfaqësues të biznesit lokal në Himarë, ku i pranishëm ishte edhe kryetari i bashkisë, Vangjel Tavo. Takimi u fokusua tek sfidat dhe mundësitë e zhvillimit të zonës, duke vënë theksin tek lidhja e ngushtë mes turizmit dhe bujqësisë.

Ministri Salla e cilësoi Himarën si një nga pasuritë natyrore më të çmuara të vendit, me potencial të jashtëzakonshëm për zhvillim të qëndrueshëm.

“Turizmi i qëndrueshëm ndërtohet mbi produktet lokale dhe bashkëpunimin e ngushtë mes fermerëve, komunitetit dhe biznesit,” u shpreh ai, duke theksuar se strategjia “Bujqësia 2030” ka në qendër forcimin e prodhimit vendas, rritjen e sigurisë ushqimore, adoptimin e teknologjisë së gjelbër dhe zhvillimin e zonave rurale në mbështetje të ekonomisë lokale.

Sipas ministrit, për Himarën kjo strategji përkthehet në mbështetje për fermerët e vegjël, promovim të produkteve autentike të zonës, nxitje të agroturizmit dhe diversifikim të aktiviteteve rurale, si dhe investime në ujitje dhe infrastrukturë bujqësore.

“Sfida për vitin 2026 është kthimi i këtyre mësimeve dhe përvojave në politika konkrete që i shërbejnë komunitetit dhe ekonomisë lokale,” shtoi Salla.

Ai shprehu bindjen se vizioni i ndërtuar bashkë me aktorët lokalë do ta kthejë Himarën në një shembull të zhvillimit të qëndrueshëm në vend.

“Jam i bindur se Himara, me potencialin e saj të jashtëzakonshëm dhe vizionin që po ndërtojmë së bashku, do të vazhdojë të jetë një shembull zhvillimi në vend,” tha ministri.

/rtsh.al/