Prokuroria e Posaçme ka kërkuar gjithsej 158 vite burg për shtatë të pandehurit e akuzuar për vrasjet e Klodian Saliut dhe Vajdin Lames në shkurt të vitit 2005. Në pretencën e paraqitur në GJKKO, SPAK ka kërkuar dënimin maksimal prej 25 vitesh burg për gjashtë prej të pandehurve, ndërsa për bashkëpunëtorin e drejtësisë, Luftar Reçi, ka kërkuar 8 vite burg.

Sipas kërkesës së prokurorisë, dënimet janë:
– Lulzim Berisha – 25 vite burg
– Emiljano Shullazi – 25 vite burg
– Plaurent Dervishaj – 25 vite burg
– Viktor Imeraj (Bajraktari) – 25 vite burg
– Indrit Taullai – 25 vite burg
– Indrit Rusi – 25 vite burg
– Luftar Reçi – 8 vite burg

Të pandehurit akuzohen për vrasje me paramendim, në kuadër të grupit të strukturuar kriminal, si dhe për vepra të tjera penale që lidhen me armëmbajtjen pa leje.

Dy ngjarjet për të cilat SPAK ka paraqitur pretencën ndodhën brenda 24 orëve në shkurt të vitit 2005. Më 26 shkurt, Klodian Saliu, ish-anëtar i Bandës së Durrësit, u vra me armë zjarri në automjetin e tij, në autostradën Durrës–Tiranë, pranë Maminasit.

Një ditë më pas, më 27 shkurt, biznesmeni Vajdin Lame dhe miku i tij Artan Arsi humbën jetën nga shpërthimi i një sasie eksplozivi të vendosur në ashensorin e një pallati në Tiranë.

Hetimet për këto krime u rihapën pas dëshmisë së Luftar Reçit, i cili bashkëpunoi me drejtësinë dhe dha të dhëna për organizimin dhe ekzekutimin e atentateve, si dhe rolet që, sipas tij, kishin të pandehurit.